حکومت کو ہم مصروف تھے کی جگہ ہم نالائق ہیں کا اشتہار دینا چاہیے ۔ مریم اورنگزیب

Maryam Aurangzeb
5

مانیٹئرنگ ڈیسک(24 گھنٹے)

Maryam Aurngzeb

پاکستان مسلم لیگ (ن) کی ترجمان مریم اورنگزیب نے کہا ہے حکومت کو ’ہم مصروف تھے‘ کی جگہ ’ہم نالائق ہیں‘ کا اشتہار دینا چاہیے۔

اپنے ایک ویڈیو پیغام میں مریم اورنگزیب کا کہنا تھا کہ ترجمان کا کہنا ہے کہ قوم ہوشیار رہے آج شام قومی نشریاتی رابطے اور سرکاری خرچ پر وزیراعظم قوم سے براہ راست جھوٹ بولیں گے۔

مسلم لیگ (ن) کی ترجمان کا مزید کہنا تھا کہ وزیراعظم عمران خان آج جھوٹ کا عالمی ریکارڈ قائم کریں گے، جنہیں جھوٹ بولنے کی عادت ہو انہیں مزید جھوٹ بولنے سے شرم نہیں آتی۔

مریم اورنگ زیب کا مزید کہنا تھا کہ آج ایک ایسا جھوٹ ہوگا جسے پاکستان سمیت دنیا کی کوئی حکومت نہیں توڑ سکے گی۔

انہوں نے حکومتی وزرا کو بھی ہدف تنقید بناتے ہوئے کہا کہ وزرا میں بھی جھوٹ بولنے کا سخت مقابلہ جاری ہے، یہاں جو وزیر سب سے بڑا جھوٹ بولے گا، عمران خان صاحب اسے سب سے بڑا میڈل دیں گے۔

مریم اورنگ زیب نے کہا کہ عوام حکومت کی 100 روز کی کارکردگی جاننے کے لیے گوگل پر تلاش جاری رکھیں۔

لیگی ترجمان کا کہنا تھا کہ حکومت نے سرکاری خرچ پر اپنے جھوٹ کی تشہیر شروع کردی ہے، اور 100 دن کی کارکردگی کے اشتہار میں پرانے 100 دن کا پلان ایک بار پھر شائع کردیا۔

انہوں نے وزیرِ اعظم عمران خان کو ہدف تنقید بناتے ہوئے کہا کہ حکومت کو ’ہم مصروف تھے‘ کی جگہ ’ہم نالائق ہیں‘ کا اشتہار دینا چاہیے۔

مریم اورنگ زیب نے کہا کہ 100 روز کی کارکردگی دکھانے کے لیے جی سی ویمن یونیورسٹی کی طرح حکومت کو ہمارے دور کے افتتاح کردہ منصوبوں کا سہارا لینا پڑرہا ہے۔

لیگی رہنما کا کہنا تھا کہ عمران خان کے جھوٹ اور ناکامی کے ”سچ“ کو چھپانے کے لیے 100 ”جھوٹ“ گھڑے جارہے ہیں۔

انہوں نے کہا کہ مسلم لیگ (ن) 100 دن کی حکومتی نااہلی، جھوٹ، ناکامیوں اور ’یوٹرنز‘ پر جلد عوام کو حقائق نامہ جاری کرے گی۔

مریم اورنگ زیب کا کہنا تھا کہ حکومت کے 100 دن عوام کے لیے 100 اذیت ناک دن تھے، پی ٹی آئی کے اپنے ووٹرز اور سپورٹرز کے لیے ناامیدی، ملک کے لیے بدنامی اور شرمندگی کے دن تھے۔

لیگی رہنما نے طنزیہ انداز میں کہا کہ حکومتی ہدایت اور عمران خان صاحب کے جھوٹ کو سچ نہ کہنے والے صحافی نوکری سے نکال دیے جائیں۔

جواب چھوڑیں